Onderstaand gedicht is geschreven door Marga Kool
op verzoek van Harry's vriend en radiomaatje Albert Haar (Harry's Blues op RTV Drenthe)
Albert besloot tijdens de herdenkingsbijeenkomst met dit gedicht zijn verhaal over de belevenissen in Amerika
tijdens hun zoektocht naar de Blues in de Mississippi Delta in 1993

CUBY WAS HERE 

Wij zeden: allemachtig, donders en merakel!

Hij zung een dwarse raand an oens bestaon.

Een olde boerderij in Grol weur tabernakel,

symbool, veur dat aj blieven kunt en daj toch vut kunt gaon.

Een olde film:

jong ventie nog, lang haor, een grofgebreide trui,

zien tussentekst in Asser plat mit bluesaccent,

was hij idool en kammeraod tegliek.

Al wat oens raakte, zat vertaald in zien muziek.

Wij gungen on the road, umdat hij oens heuren leut

dat zoveul straoten, zoveul wegen te bereizen bint,

bedapperden verdriet, as hij oens overtuugde

dat argens op een dag ien’ oenze waorheid kent.

Dat Drentse jong, dat veur een groot publiek

legende weur, lang veur zien leste lied

een ende nam, is nou veurgoed backstage.

Mar, … kan best weên, argenswaor in Grôl

of - mistige mörgen - Bâllerveld net buten Rôl,

daj dan iniene zomar ziet,

hoe in de locht een naam eschreven stiet,

de letters schots en schief: Cuby was here.

Dan schöf de wiend de hemel op een kier:

Muziek!

Gitaar, een bas, twei haanden geselt een klavier,

een voet die mit-tikt op een vloer en dan

die iene stemme, rauw en authentiek.

die zingt van draank en ienzaomheid

en van de grote liefde die hum overkwam.

Of mangs misschien een klein, zacht liedtie veur zien mam.